Beesel – In ‘ne vólle zaal van aetcafé de Troubadour is Jeugprins Teun I (Fransen) oetgerope as 65e hierser euver de Beeselse Jeugdrake. As hoeëgtepuntj van ’t gezellige Beesel’s Got Talent kwaam hae same mit ziene adjudant Mike (Kuipers) ónger de Beeselse Draak oet. Jeugprins Teun I zit in ziene vrieje tied regelmaotig thoes achter zien drumsjtel, wao hae d’r duchtig op los sjleit. In de wintjerperiode is hae ouch regelmaotig oppe sjaatsbaan te vinje. Verder voetbalt Jeugprins Teun I same mit adjudant Mike bie de JO15-1 van VV Bieslo. Jeugprins Teun I is 13 jaor en adjudant Mike is kort geleje 14 jaor gewaore. Beide jónges zitte op BC Broekhin in Remunj. Dit duo geit d’r dit jaor same mit de Jeugraod en alle Beeselse draekskes en drakinnekes ‘ne geweldig sjoeëne vastelaovend van make ónger ‘t motto:
“Ich sjlaon drie daag nörges op!”
Zónjig 24 fibberwari vanaaf 15.00 oer vinjt de receptie plaats van ózze kersverse Jeugprins Teun I en ziene Adjudant Mike. Geur kènt de niej hoeëghede den ’n hendje kómme gaeve in de zaal van aetcafé de Troubadour in Beesel.
