Wiesenfest 2016

(Inzending) Offenbeek – 18 en 19 Juni viëfde kiër wiesenfestival. Dit jaor organisere veur weer ós jaorliks “Wiesefest“, zoeë-as geur van ós gewènd ziet, höbbe veur d’r weer alles aan gedaon óm uch ’n sjoeën fieës te bezorge. Op zaoterdig 18 juni is de tent aop vanaaf 20.00 oer. Veur zien d’r in gesjlaag óm veur deze aovend twieë superbands vas te ligke, die veur ’n geweldige sjtumming gaon zorge. De ierste band is “Tirol Sound”. Dees band besjteit oet twieë jonges en ein maedje en tummert ontzettend hel aan de waeg in Pruuses en Oeësteriek.  Zoeë sjtaon ze geregeld  in ‘t veurprogramma  van de waereldwied  bekènde Zillertaler Schürzenjaeger, ónger angere bie häör Open Air in ’t Zillertal. Verder höbbe zie diverse optraejes op de televisie. In Nederlandj höbbe ze  opgetraoje op de Zjwarte Cross en op de bekènde Oktoeëberfieëste in Sittard. Boete häör eige nummers weite zie iddere fieëstent op de kop te zètte mèt de bekènde meizingers in alle mezieksjtieële. Örges rondj de klok van half elf is d’r ’n optraeje (op veler verzoek) van GipfelPower. Dees twieë jonges weite van gen ophaje en det weite veur oet ervaring. Zie höbbe al mier optraejes oppe Ruiver gehad en twieë jaor geleje zatte die bie ós de tent op de kop . Zie höbbe ein geweldige show van ongevier 3 keteer (of get langer) wao-in  zie ’t publiek  betrèkke. En ’t lök heur óm idderein mei te laote doon.